വൈദ്യുതി മീറ്റർ റീഡർമാർ ഇനി മോഷണവും പിടികൂടും ..........?

വൈദ്യുതി മീറ്റർ നോക്കി ബില്ല് തരാനെത്തുന്നവർ ഇനി വൈദ്യുതി മോഷണവും പിടികൂടും. മീറ്റർ റീഡർമാർക്ക് വൈദ്യുതിമോഷണം പിടികൂടുന്ന ചുമതലകൂടി നൽകിയിരിക്കുകയാണ് വൈദ്യുതിവകുപ്പ്. ഇതിനാവശ്യമായ പരിശീലനവും കൊടുത്തുതുടങ്ങി.

 മീറ്റർ ലൂപ്പിങ്, ഡയറക്ട് കണക്ഷൻ, സർവീസ് വയറിൽനിന്ന് മോഷണം തുടങ്ങിയ തട്ടിപ്പുകളാണ് ഇനി മീറ്റർ റീഡർമാർ പരിശോധിക്കുക. ഇതുവരെ ഇത് ചെയ്തിരുന്നത് വൈദ്യുതിവകുപ്പിലെ ആന്റി പവർ തെഫ്റ്റ് സ്‌ക്വാഡാണ്. ഇത്തരം ജീവനക്കാരുടെ കുറവും മോഷണത്തിലെ വർധനയുമാണ് മീറ്റർ റീഡർമാരെ ഇൗ ഉത്തരവാദിത്വവുംകൂടി ഏൽപ്പിക്കാൻ കാരണമായത്.

കൃഷി ആവശ്യങ്ങൾക്കുള്ള വൈദ്യുതി സൗജന്യമായിരുന്നതിനാൽ ഇവിടങ്ങളിൽ കാര്യമായ പരിശോധന ഉണ്ടായിരുന്നില്ല. തട്ടിപ്പും കുറവായിരുന്നു. കൃഷിക്കായുള്ള വൈദ്യുതിക്ക് നിരക്ക് ഇൗടാക്കിത്തുടങ്ങിയതോടെ തട്ടിപ്പ് കൂടാൻ സാധ്യതയുള്ളതായും വിലയിരുത്തുന്നു.

സംസ്ഥാനത്ത് പത്തുമാസത്തിൽ കണ്ടെത്തിയത് 25 കോടിയുടെ വൈദ്യുതിമോഷണമാണ്. ഇക്കാലയളവിൽ 20 കോടിയിലേറെ രൂപ പിഴയായി ഇൗടാക്കിയതിൽ 12 കോടിയും മലബാർ മേഖലയിൽനിന്നാണ്. കാസർകോട്, മലപ്പുറം, കോഴിക്കോട് ജില്ലകളിലാണ് വൈദ്യുതിമോഷണം ഏറ്റവും കൂടുതൽ കണ്ടെത്തിയിട്ടുള്ളത്.

വൈദ്യുതിനിരക്ക് വർധന രണ്ടുദിവസത്തിനുള്ളിൽ...?

വൈദ്യുതിനിരക്ക് വർധന തിങ്കളാഴ്ചയോ ചൊവ്വാഴ്ചയോ പ്രഖ്യാപിക്കും. എട്ടുമുതൽ പത്തുശതമാനംവരെ വർധനയാണ് റെഗുലേറ്ററി കമ്മിഷൻ തീരുമാനിച്ചിട്ടുള്ളത്.

മാസങ്ങൾക്കുമുമ്പുതന്നെ നിരക്കുവർധന തീരുമാനിച്ചെങ്കിലും തിരഞ്ഞെടുപ്പും നിയമസഭാ സമ്മേളനവും കാരണം പ്രഖ്യാപനം നീട്ടി. നേരത്തേ നിശ്ചയിച്ചതിൽ തിരുത്തലുകൾ വരുത്താനും സർക്കാർ കമ്മിഷന് നിർദേശം നൽകി. കുറഞ്ഞതോതിൽ വൈദ്യുതി ഉപയോഗിക്കുന്നവർക്ക് കൂടുതൽ വർധന വരാത്തവിധമാകും മാറ്റം. ഇങ്ങനെ മാറ്റിയ നിരക്കുകൾ തിങ്കളാഴ്ചയോ ചൊവ്വാഴ്ചയോ പ്രഖ്യാപിക്കാനാവുമെന്നാണ് കമ്മിഷൻ സർക്കാരിനെ അറിയിച്ചത്.

രണ്ടുവർഷത്തേക്ക് ഒരുമിച്ച് നിരക്ക് പരിഷ്കരിക്കാനാണ് കമ്മിഷൻ ആദ്യം തീരുമാനിച്ചത്. ഇതനുസരിച്ചാണ് ബോർഡ് അപേക്ഷ നൽകിയത്. എന്നാൽ, ഒരുവർഷത്തേക്കു മാത്രമുള്ള നിരക്കുവർധനയേ ഇപ്പോൾ പ്രഖ്യാപിക്കൂ.

വീടുകളിലെ ഉപയോഗത്തിന് യൂണിറ്റിന് 70 പൈസവരെ കൂട്ടാനാണ് ബോർഡ് അപേക്ഷിച്ചത്. താഴെത്തട്ടിലെ സ്ലാബുകളിലാണ് ബോർഡ് കൂടുതൽ വർധന ആവശ്യപ്പെട്ടത്. ഈ വർഷം 1100 കോടിരൂപയാണ് ബോർഡ് ലക്ഷ്യമിടുന്നത്. 7400 കോടിരൂപയാണ് ഇപ്പോൾ ബോർഡിന്റെ ആകെ കടം. എന്നാൽ, ഇത്രയും തുക കമ്മിഷൻ അനുവദിക്കില്ല.

നിരക്കുവർധനയ്ക്കു പിന്നാലെ ലോഡ് ഷെഡിങ്ങിനും സാധ്യതയുണ്ട്. പ്രതീക്ഷിച്ച മഴ ഇനിയും കിട്ടിയിട്ടില്ല. അണക്കെട്ടുകളിൽ വെള്ളം കുറവാണ്. 15-ന് ബോർഡ് സ്ഥിതിഗതികൾ അവലോകനം ചെയ്യും.

വൈദ്യുതി ബിൽ നിരക്കു വർധന ഇന്നു മുതൽ പ്രാബല്യത്തിൽ.?

പുതിയ നിരക്ക്

🔹 0-50 Unit -  പഴയ നിരക്ക് Rs 2.90 , പുതിയത് Rs 3.15
🔹 51-100 Unit -  പഴയ നിരക്ക് Rs 3.40 , പുതിയത് Rs 3.70
🔹 101-150 Unit -  പഴയ നിരക്ക് Rs 4.50 , പുതിയത് Rs 4.80
🔹 151- 200 Unit -  പഴയ നിരക്ക് Rs 6.10 , പുതിയത് Rs 6.40
🔹 201- 250 Unit -  പഴയ നിരക്ക് Rs 7.30 , പുതിയത് Rs 7.60
🔹 251- 300 Unit -  പഴയ നിരക്ക് Rs 5.50 , പുതിയത് Rs 5.80
🔹 301- 350 Unit -  പഴയ നിരക്ക് Rs 6.20 , പുതിയത് Rs 6.60
🔹 351- 400 Unit -  പഴയ നിരക്ക് Rs 6.50 , പുതിയത് Rs 6.90
🔹 401- 450 Unit -  പഴയ നിരക്ക് Rs 6.70 , പുതിയത് Rs 7.10
🔹 451 മുകളിൽ പുതിയത് Rs 7. 90